FUCK RUSSIA - არის პოზიცია, FUCK GEORGIA - არის მწარე რეალობა, რომლის შედეგად ჯერ ჩაისახა, შემდეგ კი ”იშვა” დღევანდელი რეალიები. ახლა ”კონტრაცეპტივების” მიღება გვიანია - გვიანია კულტურული დელეგაციებისა და დელეგატების მაღალფარდოვანი მისიებით მივლინება იმ ქვეყანაში, სადაც დიდი ხანია კარგად გაითავისეს მეზობელი ქვეყნის მთავარი ფილოსოფია და მოძღვრება Кто не с нами, тот против нас! კონტექსტი - აი, რა არის მნიშვნელოვანი ”რუსული კინოს ფესტივალის” შემთხვევაში, რომელიც დაიწყო ”ტარას ბულბას” იდეოლოგიური სარეკლამო რგოლით და დევიზით ”На всех экранах непобедимой странны”! ცინიკური კონტექსტი, რომელიც მშვენივრად გესმის და გაიგებ, მიუხედავად იმისა დევნილების ბანაკში ცხოვრობ თუ ფეშენებელურ ბინაში.
ფესტივალი წარმატებით ჩატარდაო! - გამოგვიცხადეს ორგანიზატორებმა და ფესტივალის სულის ჩამდგმელმა რუსმა კინემატოგრაფისტებმაც. რა თქმა უნდა, მიტინგს ავცდით და კინოინკვიზიტორების მიერ კრიტიკის ქარცეცხლში გატარებასაც, მაგრამ პომიდორს თუ არ გესვრიან და RUSSIA - GO-ს თუ არ გიყვირის მაყურებელი - წარმატების დადგენა-შეფასებისთვის არ არის საკმარისი კრიტერიუმი.
ფესტივალზე წარმოდგენილ ამა თუ იმ ფილმში იგრძნობოდა იმ ”ხრუშოვკის” კომუნალკების ნოსტალგია, რომელსაც აქტიურად უწევს პროპაგანდას თანამედროვე რუსული კინო, განსაკუთრებით ”გაზპრომის” კუთვნილი НТВ-КиноСоюз, რომელიც საბჭოთა ეპოქაში გადაღებული ფილმების რეტროსპექტივას გვთავაზობს სიტყვებით Мы снова вместе! ისევ ერთად ვართ?! არ ვიცი, რით ვერ შეეგუა ეს ხალხი, რომ კომუნალკაში ცხოვრებას თუნდაც ერთოთახიან, მაგრამ საკუთარ ბინაში ცხოვრება გვირჩევნია! ”კინოს საზღვრები და ბარიერები არა აქვსო!” - ხოდა თუ ასეა, იყავით თქვენ თქვენთვის თქვენს სახლში და ჩვენ კიდევ დისტანციურად გავეცნობით თქვენს კულტურას თუკი არც საზღვრები ქონია კინოს და არც ენობრივი ბარიერები! Мы снова вместе, მაგრამ რატომღაც ქართული კინო ინახება ჩვენგან ”Отдельно” - მთელი ქართული ”საბჭოთა” კინოს არქივი Белые Столбы-ს საცავებში ინახება და მას მუზეუმის ექსპონატის სტატუსი მიანიჭეს, რომ ვინმეს აზრადაც კი არ მოუვიდეს ორიგინალების მოთხოვნა.
